放屁
唔知邊個曾經講過，能夠係伴侶面前放屁就係表示佢已經視對方為一家人，因為佢能夠將自己最真實最尷尬既一面展現比你睇。
一個早上
阿傑突然被肚裡面一陣劇痛從睡夢中驚醒，仲隱約聽到個肚發出『咕咕、咕咕』既聲音，大概琴晚打邊爐食左D唔乾净既野，攪到依家極度肚痛。
雖然好想去廁所，但係阿傑仍然想訓多陣，身經百戰既佢心諗:『啊，訓得咁舒服真係唔想起身，根據我既經驗黎睇，依D肚痛通常痛一陣就無事，都係由佢。』
但係肚痛就好似地震一樣，分成幾波衝擊住阿傑，間中亦帶有餘震，根據阿傑中五程度既地理知識，當地應力超過岩石本身能承受既強度時，就會令岩層斷裂錯動，其巨大既能量就會釋放出黎，形成地震。就係咁，當依種衝擊難以再忍受時，阿傑就會選擇放屁黎減輕痛楚，通常都會湊巧。
當痛楚過去時，而阿傑就好似戰勝左一埸仗咁，為自己感到非常自豪，不自覺地自得其樂，享受放屁帶黎既勝利快感。
『阿傑，你放屁呀?』
訓係阿傑身旁既阿Ying突然咁問，令到阿傑覺得好尷尬，於是阿傑無回應，繼續閉起雙眼扮訓覺，而阿Ying見阿傑無回應，都無再過問，繼續訓。
依一刻，阿傑心裡好難受，佢心諗:『間房得我同你，唔係你放屁就係我放屁架啦，點解仲要明知過問? 係咪想落我面? 依家放屁好失禮你咩!? 我當你係我至親既人，我愛你先係你面前放屁，點解仲要問我! 點解你唔明白我! 點解!』
阿傑愈諗愈激氣，唔覺意動左真氣，肚入面既衝擊波又黎料，阿傑即時張開雙眼，暗說一句:『機會黎啦!』
今次阿傑唔再遮遮掩掩，收收埋埋咁放屁，佢決定向阿Ying展現出佢最真實既一面，將心中既怨憤同肚入面既"氣體"通通排出。
一篤......兩篤......三篤......百九幾篤......
短短幾分鐘內，阿傑既屁幾乎充斥住整間房，當中既氣味連張床被都遮蓋唔到，偷偷從床被缝隙中滲出，臭到連阿傑都聞得到。此時，阿傑洋洋得意地偷看阿Ying有咩反應，只見阿Ying慢慢地將身驅轉向另一邊，沒有說話，沒有怨言，沒有反感。
阿傑心想:『好開心你終於接受到。』
突然，阿傑肚入面既痛楚愈黎愈強烈，儘管阿傑不斷放屁黎減輕痛楚，但仍然難以忍受，漸漸地，放屁既聲音愈黎愈大聲。
『呠~~~~~~~~~~~~~~』一篤放屁聲，劃破長空。
阿Ying聽到一聲巨響後，即時起身大叫:『我真係頂唔順啦! 究竟你係咪放屁姐!? 不如你去廁所啦!』
阿傑即時起身大叫:『咩放屁呀? 你有咩證據呀? 你唔比D臭味係街外傳入黎架? 同埋就算係我放屁咁點丫! 你係咪介意先! 係既話我即刻走! 雖然唔係我放!』
阿Ying呆望左阿傑幾秒之後，然後笑笑口拍一拍阿傑膊頭，溫柔地說:『傻豬黎既，我問下姐，其實係我放屁，我想睇下你有咩反應姐，乖! 繼續訓! 我起身去廁所先。』說罷，阿Ying就起床去左廁所。
阿傑望住阿Ying既背影，心裡頭一陣甜蜜既愛意湧上黎，阿傑心想:『作為女朋友，阿Ying真係唔話得，明知係我放屁都係認係佢放，就係為左唔想我地因為放屁而嘈交，愛護我地依段感情，處處為我著想。』
阿傑決定繼續訓返，而嘴角仍然展露出一絲絲既甜蜜，不禁地說:『阿Ying，我愛你。』
-----------------------------------------------------------------------
-------------------------------------------------------------
---------------------------------------------------
-------------------------------------------
---------------------------------------
----------------------------------
----------------------------
---------------------
---------------
----------
------
----
--
-
十分鐘後。
『阿Ying!!我求下你啦! 你開門比我入去啦! 我頂唔順啦! 我就黎急到賴屎啦! 我求下你呀!』阿傑不斷敲打道廁所門。
廁所入面既阿Ying怒叫:『你條仆街! 你係咪男人黎架!?放屁都唔肯認!你係出面放屁放飽佢啦仆街!』
Search